NËUS Y L’AUTONOMIA

L’autonomia cunteda.


Na nstalazion permanënta unica per splonjer tla storia dl'autonomia, te chëla che l’architetura, la cultura y la storia anconta la generazions da ncuei y duman.

AUTONOMIAE

N'esposiziun dedicada al'autonomia dl Südtirol

Plaza Silvius Magnago - Bulsan 

N viac tla storia dl'autonomia dl Südtirol n lecord dl presidënt da n iede Silvius Magnago. Dàti na udleda al patrimone storich, artistich y culturel de nosc raion!

L percurs dla mostra permanënta mët tla lum te nuef stazions l’autonomia dl Südtirol. La conta de coche l’autonomia dl Südtirol ie unida a se l dé, ciuni che ie si cuntenuc zentrei y ce valores che ie liei limpea. Chi fova pa Silvius Magnago, che vën cunscidrà l “pere dl’autonomia” y co nfluenzea pa l’autonomia dl Südtirol la jënt che viv tlo da nëus? Co regulea pa l’autonomia la cunvivënza dla grupes linguistiches y sun ce fundamëntes finanzieres se stizela pa?  L vën nce vagà na udleda sëura i cunfins ora y tl daunì: Ulà dëssa pa l’autonomia nes mené?

L percurs vën acumpanià da na nstalazion cureda dal Chemun de Bulsan sun la figura de Alcide Berloffa, che, dlongia Silvius Magnago, ie una dla persones de majera mpurtanza tla storia dl’autonomia dl Südtirol.

Per de plu nfurmazions sun la mostra permanënta Autonomiae, scrìnes a [email protected] o chërdenes su tres l numer 
0471 32 01 62.


“Sce l ne fossa nia de mpurtanza per mé che l'autonomia vënie mantenida ëssi vivù defin per nia.“

Silvius Magnago 


N savëi deplù

Autonomia

Dal 1972, cun la jita n forza dl segondo Statut d’Autonomia ti iel unì sëurandat ala Provinzia truepa cumpetënzes y funzions legislatives. Tla mostra permanënta pon udëi la fases defrëntes de si realisazion y n giapa na sëuraududa dla cumpetënzes che ti ie unides atribuides dal Guviern zentrel ala Provinzia Autonoma de Bulsan - Südtirol.

Usanzes y tradizions

A fonz dl'autonomia dl Südtirol ie l bujën de stravardé la usanzes de nosc luesc y de defënder la tradizions y i valores culturei dl raion.


Tratatives

La mostra permanënta nes lascia udëi la truepa tratatives zariëuses che ie unides fates dal 1948 a ncuei danter l Guviern zentrel y la Provinzia Autonoma de Bulsan.

Obietifs puscibli

Ce pusciblteies y vantajes vën pa a se l dé dal'autonomia? Co ie pa mudeda la vita da uni di dla jënt dl Südtirol dal 1972 a ncuei?

Na funzion de defendura

Danter la funzions sun chëles che l’autonomia se stiza iel chëla de stravardé la mendranzes linguistiches locales sun l teritore talian, tl cajo dl Südtirol uel chësc dì, la grupes de rujeneda tudëscia y ladina.

Magnago

25 de mei 2010: Silvius Magnago, l presidënt da n iede dla Provinzia, mor a Bulsan tl’età de 96 ani. L ie stat a cë dla Jonta provinziela dal 1960 al 1989 y à renfurzà l Südtirol a livel politich y aministratif. L vën cunscidrà da duc l pere dl’autonomia dl Südtirol y à ntan si mandat abù l gran merit de avëi ulù jì sun l troi dla cunvivënza pazifica danter la grupes linguistiches nvian via l Südtirol de viers dl bënsté y dl svilup.

Identità

À pa l arjunjimënt dl'autonomia purtà pro a svilupé n’identità culturela nueva? Se sënt pa duc i zitadins y duta la zitadines unfat pert de na cumenanza o iel pa mo truepa identiteies defrëntes?

Alcide Berloffa

Alcide Berloffa ie dlongia Silvius Magnago una dla persunaliteies plu mpurtantes per la storia y l svilup dl’autonomia dl Südtirol. Te si mpëni lonch tla politica àl acumpanià cun gran sensibilità y sëns de cumpromis la tratatives danter Roma, Viena y Bulsan. Dl 2001 àl pudù pië do l Pest Vescul Dr. Joseph Gargitter per si cuntribut ala cunvivënza tl Südtirol.

Evoluzion

Cie nes aspietel pa tl daunì? Co se sviluperà pa l'autonomia y ulà nes menerala pa?


AUTONOMIAE


"L'autonomia ne ie nia zeche de statich, ma la muessa unì ntenduda sciche zeche de dinamich che possa se adaté y se svilupé tl tëmp.“ 

Silvius Magnago


Nfurmazions y cuntac

Vijites menedes

L sarà puscibl se nuzé de vijites menedes tres la mostra permanënta:
tla rujeneda taliana: vëndres 10.09.21 dales 17:30 o sabeda 11.09.21 dales 11:30;
tla rujeneda tudëscia: jöbia 09.09.21 dales 17:30 o sabeda 11.09.21 dales 10:00.
Al é poscibl da se prenoté tres e-mail: [email protected] o cherdan sö al 0471 32 0162 (dales 09:00 ales 12:00).
Tosc podaran ince prenoté vijites por les scores tres la plataforma nova-bz.org.

Orares de giaurida

La mostra permanënta ie davierta y da pudëi udëi uni di dl’ena da uni ëura. Per udëi la mostra zënza vijita meneda ne iel de bujën de deguna prenutazion y la vijita ie debant.

Adres y cuntac

La mostra permanënta ie da udëi sun plaza  Silvius Magnago a Bulsan.

Urganisazion: Azienda Museums provinziei
tel: 0471 32 01 62
e-mail: [email protected]